Инстант овесна мешавина

Еден период собирав многу рецепти. Се што ќе најдев интересно, го складирав по фолдери. И пак кога сакав нешто да зготвам, по фолдерите не можев да најдам рецепт што ми се допаѓа, па пак барав нови.

Така некако дојдов и до овој рецепт. Пребарував идеи за појадок, ама условот беше да се состави нешто во поголема количина и ми се наоѓа при рака за итна употреба. Налетав на видео на Џејми Оливер и си реков - ова е тоа!

Каша од инстант овесната прашина

Најдоброто кај оваа овесна мешавина е што излегува голема количина и спакувана во хартиена кеса и на ладно може да се чува доста долг период.

Во моменти кога немате идеја што за појадок/ужина/вечера (што и да е), мешавината веќе е подготвена, само треба на брзина да се свари или да се покисне со млеко или јогурт, да се додаде овошје (или не мора да се додава ништо) и толку.

Инстант мешавината одлично оди со лешници во составот

---

Инстант овесна мешавина

Време за подготовка на состојките: 15 минути

Време за варење на кашата: 5-10 минути

Се подготвува во мултипрактик

Состојки:

1 kg крупни овесни снегулки

350 g комбинација од семки и јатки (пр.лешници, бадеми, сончоглед, сусам...)

250 g суво овошје (урми, суво грозје, брусница...)

1 голема лажица инстант кафе

3 големи лажици какао

Овесната каша може да се комбинира со овошје

Опис:

1. Јатките/семките се тостираат во загреана рерна на 190 степени, 10-15 минути, па се оставаат да се изладат.

2. Сите состојки се мелат во мултипрактик.

3. Ваквата мешавина се чува во хартиена ќеса или во стаклен сад, на ладно, до 1 месец.

Начин на користење:

1. 1 чаша од мешавината се вари со 2 ч вода.

2. Откако ќе ја впие водата, се додава 1 чаша некаков вид млеко (соино, кравјо, козјо) и се вари до посакуваната густина.

3. Се сервира со овошје, кокос, рендано чоколадо или со грчки јогурт или соја јогурт (сето тоа по вкус)

Инстант овесната мешавина претворена во каша